Hei igjen!

Her har sneglane blitt sorterte og fått separate «hus». Om du ser nøye etter, kan du sjå ein grådig kråkebolle på toppen av den kvite boksen. Allerede 10 min etter foring av sneglane prøvde han å stjele maten deira!

No har eg allereie hatt 50 timer av praksisen min, og mykje har skjedd sidan sist innlegg! Praksisen starta med ei omvising av Michael Sars-senteret som ligg i 2.etg på Høytek. Der fekk eg sjå laben eg skulle jobbe på, og den mest spennande delen av omvisinga var når eg fekk sjå rommet dei har Ciona intestinalis i (hovudmodellorganismen Chatzigeorgiou-gruppa forskar på), og sneglane som var infiserte med parasitten me skulle forske på dette semesteret. Me var til og med så heldige at me fekk eit kontor å jobbe i medan me har praksis der!

Den fyrste dagen på lab starta me med å sortere sneglane etter kva parasitt dei var infisert med, sidan det kun var sneglane som var infisert med C.lingua som var av interesse for oss vidare i prosjektet. For å gjere dette plasserte me sneglane under ei lyskjelde i 1 time for at parasittane skulle trekke ut av sneglen og inn i vatnet slik at me kunne identifisere parasittarten under mikroskopet.

Etter me hadde isolert sneglane av interesse, starta me på den eine hovuddelen av prosjektet, nemleg å undersøke den vertssøkande svømmeatferda til C.lingua (metode på bildet under). Larveforma som utviklar seg i sneglen infiserer fisk som den brukar som midlertidig vert, og forårsakar svarte prikkar i huden til fisken. For å finne ein måte å forhindre at larven klarar å svømme for å infisere fisken, prøvar me diverse kjemikaliar som enten blokkerer eller overaktiverer ein del av nervesystemet til parasitten. Ved å ta opptak av atferda til parasitten under påverknad av desse kjemikalia ser me om dei har noko verknad på svømmingen. Dette brukte me dei neste vekene på. Målet er å finne ein kur mot denne parasittinfeksjonen, som fiskeindustrien vil ha nytte av.

Frå venstre til høgre: Me plasserar sneglane i brett, før dei fyllast med vatn og blir sett under ei lyskjelde i 1 time før parasittane samlast inn. Medan denne timen går, lagar me kjemikaliet klart. Etter kjemikaliebehandling, plasserer me mellom 1-5 parasittar i ein agarosearena. Deretter plasserer me tre slike arenaer i ein inkubator med fast temperatur, før me tar ned den svarte gardina for å venne parasittane til mørket før opptak. Sidan parasittane tiltrekkast mot lys, er det viktig å ha det mørkt for at lyset ikkje skal påverke svømminga. Deretter justerer me nødvendige innstillingar for opptaket, før me tar opptak i 5 minutt.

Meg i buldreveggen!

Ellers har det kvar fredag vert labmøte der ein frå forskingsgruppa presenterer noko dei har jobba på, og dette går på rundgang. I tillegg er det seminar omtrent annakvar fredag, der ein gjesteforelesar kjem til senteret og fortel om kva forskingsgruppa deira jobbar med, noko som har vært veldig lærerikt å høyre på! MEN, eg har ikkje kun vert på lab. Ein ettermiddag var eg med labgruppa ut til Laksevåg på buldring, noko eg aldri har prøvd før! Det var utfordrande, men veldig kjekt når eg fekk det til!

Snakkast om nye 50 timar!